Muxaadarooyinka Sh. Maxamed Idriis, London-UK

Waa Kuwama SCWC (ama IIC)
Somali Cultural Watch waa hay’ad khayri ah, oo ka diiwaan gashan UK, hawsha ay Jaaliyadda u qabatana kama raadiso manfaco aduun. Waxaa aasaasay Mutacallimiin Soomaaliyeed oo kaashanaya qaybaha kala duwan ee Bulshada sida Odayaasha, Haweenka iyo Dhalinyarada, si ay u buuxiyaan baahida jaaliyaddooda, uguna khidmeeyaan wixii anfacaya. Hay'adda SCWC ayaa ah tan hirgalinaysa mashruuca Masjidka Islington Islamic Centre.

Waxqabadkii SCW
Somali Cultural Watch waxay muddo sagaal sano ah soo waday khidmooyin sida la talinta jaaliyadda, Casumidda culimo waawayn si ay uga baahi tiraan jaaliyadda arimaha khuseeya iyaga iyo caruurtooda ee masiiriga ah, iyagoo sanad walba u qabanayay shirar diineedyo waawayn oo ay jaaliyadda inteeda badani isugu imaanaysay. Waxay kale oo Jimciyaddu waday ol-oleyaal ay wax ku barayso caruurta Soomaaliyeed iyada oo u furtay Dugsiyo/Malcaamado Qur’aanka iyo Islaamka ay ku bartaan.

Hay’addu waxay hawlahaas dhinac waday in ay aasaasto Masjid jaaliyaddu ku soo hirato oo saldhig u noqda waxtarka jaaliyadda, laakiin caqabado dhaqaale awgood, Jimciyaddu kuma guulaysan inay hirgaliso Masjidkaas, waxayse uruurisay lacag gaaraysay ilaa £80.000.

Jaaliyadda iyo Marxaladda taagan
Maamulku iyaga oo tixgalinaya marxaladda ay Jaaliyaddu hadda marayso oo ay caruurtiii Soomaaliyeed ee Qurbaha ku kortayu isu badaleen Kooxo danbiilayaal is dilaya ah, ayay waxay go’aansadeen inay lagama maarmaan tahay in la helo Masjid lagu badbaadiyo intii la badbaadin karo, laguna hormariyo inta wali roon, lagana taageero Waalidiinta

Meel la helay
Maamulku waxay ku guulaysteen in ay helaan meel ku haboon inay noqoto Masjidka Saldhigga Jaaliyadda, oo ku yaal meel u dhaw bartanka London, ayna ka soo wada gaari karaan jaaliyaddu daafaha kala duwan ee Magaalada. Meeshaas oo ku kacaysa qiime dhan £1.6 Million.

Qadarta Alle iyo xikmaddiisa, meeshaasi way fakatay oo laguma guulaysan sababo dhaqaale iyo isbadalka dhaqaalaha caalamka oo saameeyay qolyihii lahaa iyaga oo door biday in ay xaraashtaan. Waxaase muddo yar ka dib la helay meel aad ugaga sii haboon oo ay isla qiime yihiin.

Hawl-gal (Wajiga 1aad)
Waxay marti qaadeen Culimo uu ka mid ahaa Sh. Maxamed Idriis oo ah Sheekh ku caan baxay u ololaynta waxa anfacaya bulshada Soomaaliyeed meel kasta oo ay joogto, si uu muddo laba todobaad ah Jaaliyaadda London ugu jeediyo Muxaadarooyin isaga oo kaashanaya culimada kale oo uu ka mid ahaa Sh. Mustafe Xaaji Ismaaciil oo aad wada garanaysaanu, Jaaliyaddana loogu gudbiyo mashruuca Masjidka, si wanaagsanna way u soo dhamaatay.

Wajiga labaad
Wajiga labaad ee ololaha Masjidka ayaa loo gudbay, kaasoo ah in la gaarsiiyo qof kasta oo Soomaali ah si loo dareensiiyo Mas’uuliyadda kaga aaddan u khidmaynta Jaaliyadda Soomaaliyeed ee Muslimka ah iyo Badbaadintooda, si qof waliba u dareemo dawrka ku aadan ugana soo baxo ileen ‘ilko wada jir bay wax ku gooyaane’. Waxaa waliba intaas u sii dheer faa’iidada aakhiro ee uu ka helayo Masjid uu dhisay ama gaday.

Wajiga sadixaad
Waxaa lagu guulaystay in la kireeyo Masjidka isaga oo khadamaad lagu diirsaday bilaabay bishii May ee 2009, looguna jiro kiro ahaan. Waxaana garab socda sidii loo xorayn lahaa oo loo iibin lahaa.

Khidmooyinka Masjidku bixiyo ama bixin doono
Waxaa la qorsheeyay in Masaajidku uu ahaado mid nashaadkiisu aad u sareeyo si uu u guto dawrkiisa, sidaa awgeedna waxaa la arkay in lagu fuliyo waxyaabaha soo socda:
1-Khidmooyinka Masjidka
-5-ta Salaadood, Salaada Jumce,Qayb Haweenka u khaas ah, Taraawiixda iyo labada Ciidood
-Barashada Diinta (Tafsir, Hadith, Fiq-hi, Siirah, Caqiidah, Luqadda Carabiga IWM)
-Nikaaxa iyo khadamaadkiisa

2. Khidmooyin Waxbarasho
-Dugsi/Malcaamad (Gabdhaha, Wiilasha, Dumarka & Ragga)
-ISkool islaami ah oo bixiya Duruusta Iskoolka iyo mid Islaami ahba (Xisaab, Saynis, English, IT, IWM. dhanka kalana Maadooyin loo diyaariyay inay u dhisaan garaadka ubadka sidii qof Muslim ah oo ixtiraama Allihiis, Waalidkiis iyo dadka oo dhan)
- Waxbarasho dadka waawayn

3-Nashaadka dhalinyarada iyo Khidmooyinka dadka waawayn
-Mashruucyo loogu talo galay dhalinyarada waqtiyada fasaxa, oo ku aadan noloshooda.
-Siyaarada Xabsiyada, ku baraarujinta dhalinyarada jaaliyadda waxyaabaha gayn kara Xabsi sida Danbiyada iyo Drugs-ka. Barnaamijyo maaweelo oo looga hor tagayo in ay waqti u helaan inay sameeyaan wax Xabsi gayn kara IWM.
-Gaarsiinta dadka aynu la noolnahay wajiga saxda ah ee Islaamka.
- La talinta Jaaliyadda guud ahaan iyo qof-qofba.
Waxaan Allah ka rajaynaynaa in 5-ta sano ee ugu horaysa ee Masjikaanu ay noqoto mid si sare u mira dhasha, oo faa’iidadeeda laga dareemo dhinac kasta, dhinac Waxbarasho, mid dhaqan iyo mid diineedba.

Allah wuxuu ina amray
Alle wuxuu Muslimiinta amray inay isu kaalmaystaan khayrka, sharkana isaga kaalmeeyaan, inay u tartamaan fulinta khayrka iyo dhaqan galintiisa, wuxuuna booriyay in loo kala hor maro. Wuxuu balan qaaday in darajooyin sare lagu abaal marin doono ciddii heer sare ka gaarta khayrka, Ajarkoodana loo laalaabi doono in badan. Waliba ciddii khayrka dadka tustana in ajarka ficilka ciddii ay tuseenna la siin doono ayuu noo sheegay iyadoon iyagana laga nuqsaamin.

Marka miyaysan wanaagsanayn in aan u tartanno samaynta khayrka sida dhisidda Masjidkaan oo kale intaan maalkeenna cid kale yeelan (geeri), oo aan waliba dadka kale gaarsiinno inta qof kastaa siiyo dhawr saac oo telephone-ka qabsado gaarsiiyo intuu gaarsiin karo oo halkaa ka qaniimaysto, mise shaydaankaan raacnaa oo nafteenaan waxaas oo khayra kala bakhaylnaa? Nabigu (SCW) wuxuu yiri: “Qofkii Masjid Alle darti u dhisa, Alle isna Qasri ayuu Janadda uga dhisaa”. Marka Walaal ka gaar oo diyaarso Gurigaad dagi lahayd noloshaada dhabta ah.

Qiimaha Masjidku waa hal malyan iyo lix boqol oo kun (£1,600,000) ilaa iyo hadana waxaa gacanta ku jira ilaa 300,000 ku dhawaad, kirana way ku socotaa.